شاعر العامية الكبير فؤاد حداد -أشعار

بكيت في الأول بكيت في الثاني

-----------------------------
بكيت مسحت دموعي

بامسح دموعي بكيت

املوا علينا البيت

املوا علينا المخيم

املوا علينا الظلام

أنا القتيل المتيم

املوا علينا الشجن

أنا قتيل اتسجن

قتيل في يوم الفطام

املوا علينا الهوا

املوا علينا عنينا

نزفنا دم النور

نزفنا في حبكم

دم الخيال خلينا

كل البلاد و الشهور

بلد وشهر حرام

قليل ما قلنا يا ريت

بكيت مسحت دموعي

بامسح دموعي بكيت

املوا علينا اابيت

املوا علينا الطريق

مبلول كأنه طري

غنيت لقطر الندى

من كتر ما غنيت

شقت جفون اللي نام

رمت صبية و غلام

املوا علينا الصرخة

املوا علينا الكلام

املوا علينا الفرحة

قليلة يوم الانتقام

قليل ما قلنا يا ريت

بكيت مسحت دموعي

بامسح دموعي بكيت

املوا علينا البيت



فتفوتة شجن
--------------

يا كلهم عارف إني أنا وهما

لا غبار المصانع

مئات الغيطان

مسيل المدامع

الليل الغميق أرغولنا

الشمس بتغزل على نولنا

طلي وباركي

في الناس اللي بيغنوا لنا

ملك ذراعي

هدهد كركري

لازق علي دماغي

حبة شمس وحبة ليل

شجر الشارع

نازل طالع وانا بازقق فراخي

واغني سوابق ..



أراجوز
---------------

انا والدى كان أراجوز..

وكان راخر جميل الصوت .. والزعبوط..

وفى يوم من الأيام .. خللى بالك معايا ..

هنا العقده .

ندهه الملك .. وده كان ملك أعظم من العمده ..

وعينه .. مضحك ولى العهده ..

وقاله يا ألعب من القرموط ..

تضحك الولد .. أعلى مراتبك ..

تبكى الولد .. أقطع رقبتك ..

أفهم كلامى .. وأمشي بالمظبوط ..

أنا والدى الله يمسيه بالخير ..

ماكنش ناقصه .

طلع سلاح أبيضانى .. وقطع رقبته بنفسه ..

راح الولد فى البكا .

وأنا والدى مات مبسوط .

أنا والدى مات مبسوط عشان عكس امر الملك ..

أيام ما كان الملك .. ملك ..

ومصروف الأمل مضغوط .

من يومها وأنا عندى جيوب انفيه ..

وعيونى كما الحنفيه .

والدمع منى و فيه .

بحر ماله شطوط.



سجنوني
------------

ليه ما قبلتش أعبد الأوثانْ

ليه ما اكتفتش بأضعف الإيمانْ

سجنوني

ليه قلبي مصري وعيني مصريهْ

وحياتي كلمه في خدمة الأوطانْ

سجنوني

طالب بعدل ونور وحريهْ

وبهدمه للعريانه والعريانْ

وبراحه للعرقانه والعرقانْ

وبرحمه للعطشانه والعطشانْ

وبساعه للغلبانه والغلبانْ

من إنسانيه يعيشها كالإنسانْ

سجنوني

ليه الطيور بتغني ع الأغصانْ

لحن السلام وروائع الألحانْ

سجنوني

ليه مش خسيس مش وغد مش حيوانْ

سجنوني

ممنوع أقول للحق إنت الحق

وأشوف مرائي العينْ من الأحزانْ

أو أسمع المسموعْ من الأشجانْ

ما رضيتش أعيش من غير عيونْ وودانْ

ما رضيتش اعيش من غير فؤاد ولسانْ

سجنوني

ليه قلت طرد الطاغي في الإمكانْ

ليه قلت هان الطاغي قبل ماهانْ

سجنوني

كان صدقي بيفن عمرو إيدن كانْ

عهد الضلام والبغي والطغيانْ

كان شعبي مسجونْ كان فاروق سجانْ

سجنوني




القهوة
-----------

القهوه تحبّ كنكه

والكنكه تحب كنبه

والكنبه تحب قعده

مبسوطة مربّعه

وكنّا أربعه

أنا وانتِ وأنا وانتِ

*****

وكنا عيون كتير

وطبليّه وزير

ولا بنحبّ نبكي

ولا بنعرف نطير

أنا وانتِ وأنا وانتِ

*****

سبنا البوسطه ورانا

في الترماي اللي داير

العتبه للإمام

كان ريقك جنبي ساكت

حبّيتك من زمان

أنا وانتِ وأنا وانتِ

*****

شمّيت لادن سعيد

شمّيته من بعيد

شمّيته من قريّب

خمس سنين حاغيّب

على الشماعه خايف

وباخاف على الدولاب

وبادوب على البلاط

وباحسّ الظله تقلت

وباسمع الوابور

وباحسّ الميّه تقلب

أنا وانتِ وأنا وانتِ

*****

الظُهر الشمس تلحس

الظله في الليمان

والظهر الشمس تعمل

سيبرتايه دهب

بصينا لبعض فيها

ومشينا لبعض نبكي

وقعدنا من التعب

أنا وانتِ وأنا وانتِ

*****

باقول لك إيه باقول لك

حاجيب حاجات قديمه

قلبي كوره شراب

نلعب والا ما نلعب

فرحت لنا المدينه

وامبارح في التراب

أنا وانتِ وأنا وانتِ

*****

وبنفرش ضينا

على ظلّة بعضنا

واحنا بنبرد هناك

علشان ندفا هنا

والقهوه تقول لنا

على بال النار ما تلسع

بتبقى حنيّنه

أنا وانتِ وأنا وانتِ ..



منقول عن الموسوعة العالمية للشعر

على هذه القصائد الرائعة جدا لشاعر العامية الأول

قصايدروعة لشاعر اروع

أنا القتيل المتيم

املوا علينا الشجن

أنا قتيل اتسجن

قتيل في يوم الفطام

املوا علينا الهوا

املوا علينا عنينا

نزفنا دم النور

نزفنا في حبكم

كلمات رائعةةةةةةةةةةةةةة

فنان الشعب الخالد بكلماته المضيئة
شكرا لحسن الإختيار