أستاذ البلشى

خير بإذن الله

والله مفتقدين أستاذنا الكبير وتعليقاتة اللاذعة والطريفة

إن شاء الله خير

بإنتظارك يا كبير وإن شاء الله بخير وصحة

اتمنى الإطمئنان عليه وشكرا على الروح الحلوة دى فى المنتدى

يعترينا القلق على الأخ العزيز البلشى خاصة أنه من الأعضاء المواظبين على التواجد يوميا وأتمنى من الله أن تكون غيبته خير

ياجماعة لو حد يعرف نمرة تلفونه نكلمه للإطمئنان عليه

أنضم لكم فى مظاهرة الحب وأتمنى من الله أن يكون غيابه خيرا

عودة سريعة وتكون بخير

شكل الويندوز سقط وفيه أزمة
يارب يكون مفيش مشاكل ويرجع بالسلامة

الواحد يا جماعة بدأ يقليق على الراجل المحترم ياريت حد يفيدنا بآخر الأخبار

يا استاذنا الكبير فينك

يا جماعة الموضوع فيه حاجة مش طبيعية رجاء من الإدارة موافتنا

galal كتب:

يا جماعة الموضوع فيه حاجة مش طبيعية رجاء من الإدارة موافتنا

قمنا بإرسال رسالة خاصة على بريده الإلكترونى وللأسف بلا إستجابة ونتمنى من الله أن يكون بأفضل حال

بفضل الله تم العثور على رقم هاتف الإستاذ البلشى وتم إرسال رسالة له للإطمئنان وسيتم الإتصال به غدا إن شاء الله والإطمئنان عليه

د/تامر محمد كتب:

بفضل الله تم العثور على رقم هاتف الإستاذ البلشى وتم إرسال رسالة له للإطمئنان وسيتم الإتصال به غدا إن شاء الله والإطمئنان عليه

شكرا دكتور تامر جزاك الله خيرا

أصدقائى و حبايبى و اخواتى الغالين اوى عليا .
انا الحمد لله موجود فى الدنيا بفضل الله عز و جل و لا ازال حيا ارزق الحمد لله تعالى .
و الله واحشنى موت موت موت كلكم و ماكانشى حايشنى عنكم الا الشديد القوى و الله العظيم .
و فعلا وصلتنى رساله الاخ و الصديق الصدوق النادر الوجود فى هذه الدنيا الدكتور تامر محمد أعزه الله و أكرمه الله و بارك فيه و بارك له و اطال الله لنا عمره .
حبايبى انا و الله مش عارف اقول ايه و لا ايه ولا ايه قصاد الموضوع الرائع الجميل ده اللى عملتوه عشان تسألوا عليا و تطمنوا عليا .
انا بعد فترة غياب بافتح المنتدى بالصدفه و لقيت الموضوع ده اتفاجأت بشده لا تحتمل و ماكنتش مصدق اللى انا شايفه على الشاشه و بأقراه و لقيت نفسى مابقيتشى على بعضى حتى مراتى كانت نايمه و الله صحيتها من النوم و قولتلها قومى شوفى أصحاب جوزك و زمايله و حبايبه على منتدى السيارات بيسألوا عليه و عايزين يطمنوا عليه .
و الله مش عارف اقول اى حاجه ولا عارف اجمع على لسانى جمله مفيده اشكركم فيها على الشعور النبيل و الجميل و النادر ده .
و يا ريت تعذرونى و تسامحونى على فترة الغياب الطويله دى و لكن غصب عنى و الله . الجهاز كان تمام و شغال مش ويندوز سقط ولا حاجه بس انا اللى كونت مدى الجهاز راحه مؤقته عشان المشغوليات اللى ورايا الفتره اللى فاتت .
و الله غصب عنى انا و ابن خالى كوننا بنجهز للموسم الصيفى و كان لازم نستعد له جامد و ما كونناش بندخل بيوتنا الا بعد الساعه 2 و 3 بالليل كل يوم بنلف فى كل بلد من كذا محافظه عشان نجمع سيارات للمكتب بتاعنا عشان تكون جاهزه للعمل و الايجار بعد ان تعدى حجز السيارات على 12 سياره و على مدد مختلفه لاخواننا العاملين بالخليج اللى هاينزلوا يقضوا اجازاتهم السنويه .
و الحمد لله ربنا كرمنا و وفقنا فى تجميع 7 سيارات و بأسعار معقوله و موديلات حديثه و حاله ممتازه و معظمها اوتوماتيك من لانسر و الانترا و أفيو و اوبترا و الحمد لله فضل و نعمه من عند المولى عز وجل .
السبب التانى كونت باجهز و اعمل توضيبات فى معرض الاجهزه الكهربائيه الخاص بى و مع ارتفاع الاسعار ارتفاع رهيب جدا فى الفتره السابقه و تحديدا منذ اول ابريل الماضى الا انه كانت الطلبات مستمره على الاجهزه الكهربائيه نظرا لبدء الأجازه الصيفيه و كثرة مناسبات الزواج و تجهيز العرائس و كله بفضل الله و كرمه و رحمته .
فكونت باعمل جرد فى المعرض و اشوف البضاعه الناقصه و باكملهاو أعددت البضاعه المطلوبه و الحمد لله عملت زياده فى المعروض لكى أفى بطلبات جميع عملائى و عملاء المعرض و الحمد لله و الشكر لله .
و انا اسف جدا جدا جدا اذا كونت سببتلكم المزيد من القلق لطول فترة غيابى . و انا اصلا ماقدرشى ابعد عن المنتدى و عنكم كل الفتره دى لكن انتوا عرفتوا الظروف اهو و سامحونى و اعذرونى . انا مش عارف اقولكم ايه انتوا نعم الاخوه و نعم الاصدقاء و اوفاهم و اغلاهم .
و الله لسه الدنيا بخير بجد و مصر بخير بجد ان فيها ناس زيكم مخلصين و اوفياء و رجاله بمعنى الكلمه .
و انا بردو حاسس انى مقصر فى حقكم و فى حق بلدى مصر الغاليه و لكن الظروف اللى خليتنى حتى غير متابع لاحوال البلد السياسيه و الاخبار و الاحداث اللى حصلت الفتره الماضيه . يمكن كونت متابع الاحوال اقتصاديا لما لاحظته من ارتفاع جميع الاسعار الغذائيه و الاستهلاكيه و الصناعيه فى البلد . لكن نقول ايه ادى الله و ادى حكمته. و ربنا يصبرنا على ما ابتلانا . أدينا عايشين و بنستحمل و بنكد على أد ما نقدر عشان مستقبلنا و مستقبل ولادنا .
و أخيرا ان شاء الله اعود معكم كما كونت فى السابق و اتابع معكم كافة الاخبار و الاحداث و المستجدات الحاليه فى مصر و ان شاء الله ترجع مصر احسن من الاول و اقوى من الاول باذن الله تعالى .
ربنا يكرمكم كلكوا و يوفقكوا فى حياتكم جميعا و يخليكوا ليا يا حبايبى يا غاليين و الله انا بادعى ربنا انه يمن علينا بكرمه و يتيح لنا فرصة اننا نتقابل كلنا و نشوف بعض وجها لوجه و نسلم على بعض و نتجمع كلنا فى مكان واحد يجمعنا كلنا على الخير و الموده و المحبه و المعروف عشان أشوف الناس اللى بتحب بجد اللى بتعرف معنى الحب و الاخلاص و الصداقه و الاخوه و الرجوله فى زمن انعدمت فيه كل المعانى الجميله و المبادىء النبيله و الاخلاق الحميده و طغت المصلحه الشخصيه على كل القيم الانسانيه .
سلامى لكم جميعا و قبلاتى و تحياتى الحاره و العطره لكم جميعا عضو عضو و مجلس الاداره و مشرفين و مؤسسين و المنتدى كله .
و السلام عليكم و رحمة الله و بركاته .

ألف مليون حمد الله على السلامة يا أستاذنا واحشنا كتير والحمد لله إنك بخير

يا راجل خضتنا عليك
نورت المنتدى يا أستاذ رائد

حمد الله على السلامة يا أستاذ بلشى
واضح جدا من ردك طيبة قلبك وإخلاصك وأنك إنسان مميز
شكرا للأستاذ أسامة رفعت والدكتور الكبيرأديبنا المبدع دكتور تامر محمد

ألف حمد لله على سلامتك ياباشا وتمنباتى لك بالخير والتوفيق

الله يسلمكم جميعا و يحفظكم و يبارك فيكم و يخلى قلوبكم كلكم عامره و غنيه بالنور و الايمان و الصفاء والحب .
شكرا كثيرا جدا لهذه الروح الطيبه و المشاعر النبيله و الرقيقه .
و الله أنا أبسط و أقل بكتير جدا جدا من كل هذا الترحيب و التقدير و الحب النابع من سمو و نقاء أرواحكم الوفيه . و أنا و الله لا أستحق منكم كل ذلك و كان أجدر بى أن أجد هذا الحب و التقدير و الاعتزاز من ناس كونت أعتقد فى يوم من الأيام انى عزيز و غالى عندهم .
و ربنا يقدرنى و يخلينى أتغلب على ضغوط العمل فى الفتره الحاليه و أنهى كل مسؤلياتى حتى أستطيع التواصل معكم و التحاور و التناقش فى كل الأمور اللتى تخص مصرنا الحبيبه و الغاليه جدا على قلوبنا جميعا .
مره تانيه مليون سلام و تحيه لكم جميعا .

نورت يا كبير