ملك الغابة

د . هانى أبوالفتوح يكتب: مَلِكْ الْغَابةْ!!
الثلاثاء، 6 سبتمبر 2011 - 09:00




دنيا وعايشين فيها غَلابَة
بس الدنيا ساعات تِتْحَوِل
شوية شوية تِصْبَحْ غَابة
قلت أتْمَشَّى فى وسط الدنيا
وأشوف بِعْنَيَّه الحال الأول
أشوف مين عايش ونَاِفْشْ رِيشُهْ
وأشوف مين عايش بس بْجِيشُه
وأشوف مين عايش مع دَرَاويِشُه
وأشوف مين عايش مَيْتْ حَى
وأشوف من عاش فى الحب صَبَابة
.........................
واحد حارس عَالبوابة
قَالِى إتفضل ولْمِينْ جَايْ
قُلتْ أتمشى وأشوف الدنيا
أشوف إيه حاصل
وليه الناس كُلَّتْهَا تَعَابة
قال إتفضل إدخل جُوة
بس اْسْتَحْمِل م إللى تْشُوفُه
م إللى يقولك عاوز حَقْي
وم إللى ينادى عليك ويْزَعَقْ
وإللى يْقَطَّعْلَكْ فى هْدُومَكْ
وإللى يْصَرَخْ وإللى يْحَمْرَقْ
ومَتِزْعَلْشْى
خَللى حسابك عَالْحَسَّابة
......................
سِمِعْتْ الناس بِتْقُول فى كلام
إللى بيحكى عن حكاياتهُ
وعن أَساطيرهُ وعن رواياتهُ
وإللى يقول أنا شُفتْ مَنَامْ
وإللى يقول أنا هَمِّى فْطَارى
هَمِّى أْتْغَدَّا وهَمِّى أتْعَشَّى
هَمِّى فى نفسى كفاية عليا
أَكْلْ ولادى حِلْمْ الأحلامْ
وإللى حكايته بقتْ مشهورة
جِوة الصورة وف الأفلام
عامل نفسه زعيم الثورة
عاوز الناس تِضْرَبْ لُه سلام
وإللى يقول دا مفيش زَيى
وبحكى وأغنى وبَرْقُصْ بلدى
مانا مِتْعَلِمْ أحلى عَلاَمْ
.......................
سِبتْ الدنيا رُحتْ الغابة قُلتْ أتمشى
غابة واسعة وحلوة وبِرِحَة
وتنفع نكتب فيها قصيدة
ونرسم صورة وأحلى سُطور
وأكيد بعد الضلمة ماراحت
شعب الغابة مِسْتَنِّى الْنُورْ
فَتَحْتْ عِنَيْه أشوف الغابة
بَبُصْ بعيد شُفْتْ طُيور
بتجرى بسرعة بَرَه الغابة
بتقول خَايفه ياكُلْهَا نْسُور
حتى القُطَة بدال ماتْخَرْبِشْ
تِجرى بسرعة تْنُطْ السُور
ألف خسارة فى نُص الصورة
شُفت حريقة فى وسط زهور
وشُفت الفيل بيقول موواويل
وإنه هَيكْشِّف ف المستور
وأبو قردان بيقول فى بَيان
والْتَّعلبْ واقف مغرور
بيقول للكُلْ خلاص م الليلة
مفيش للغابة رئيس يِحْكُمْنا
ومَلِكْ الغابة جِوة ف قَفَصُه
هناك محبوس ومريض محظور
وقرود واقفه هناك تِتْنَطَّطْ
بتقول عينى بقت عَالْحُكْمْ
ولازم مَرَّة يْجِينِى الدُور
.......................
قصة غريبة , وقصة عجيبة
معقولة يِحْصَلْ دا فى شهور
أكتر حاجة نفسى أسمعها
كانت قصة ملك الغابة
وإللى حصله بعد الْمُلْك
وبعد الحكم وبعد الْفَرحة
إللى معاه وإللى يساعدوه
بعد التاجْ وِلْبْسْ العاجْ
ثَارْ الشعب لِبسوا الْطَرْحَة
.......................
وِمَلِكْ الغابة بَحْ خلاص
ولا لُهْ كِلمَة وصُوت مسموع
و إسمه مَعدشْ مَلكْ الغابة
إللى ينادى يْقُولك سابق
وإللى يقول إِسْمُه الْمُتنحي
واحد تانى يْقولْ مُتَخَلى
وإللى يْقُول إسمه المخلوع
قُمْتْ سألتْ وقلت يا ناس
حَد يقولى إيه الموضوع
قالوا دا شعب الغابه اْتْحَرر
بعد مامات نُصه من الجوع
وعَمل ثورة جُوة الغابة
والثورات دى مافيها رجوع
سِبْتْ الغابة وجْرِيتْ جري
تانى عالدنيا قُلت أنا مالى
حَد يسيب أفراح الدنيا
وكَتْبْ كتاب ولا سْبُوعْ
وييجى يشوف أحوال الغابة
ومَلِكْ الغابة سابق مُتنحي
أو متخلى أو مخلوع
........................
سَمْى يا عم براحتك قُولْ
بعد السطوة وبعد الْمُلْكْ
وبعد العز دا كُله يْزُولْ
شوف دلوقتى بياكل إيه؟
وعايش إزاى وعايش ليه؟
حِتِّةْ جبنة وحَبْةْ فول
الله يرحم زمن الكافيار
خد لك عِبرة م إللى حَصَلُه
و ياما فى عِبَرْ الغابة أسرار
لو بنى آدم جوة الدنيا
أو فى الغابة أسد و حمار
إبنى فى مُلْكَك زى ماتِبْنِّى
من غير عَدْلْ الْمُلْكْ إنهار
وَحْدُه هو صاحب الْمُلْك
زَى ما يِوْهِبْ زَى مايِنْزَعْ
سُبحانه وَحْدُهْ القَهْارْ!!

عن اليوم السابع

الله على الابيات الجميلة والفكرة الرائعة

قصيدة ممتازة

الله عليك

حلة جدا هذه القصيدة