لما الوطن بيثور..
للشاعر عوض بدوى
***====***
قاللى الوطن بيثور.. أنا قلتله إيه ده؟
قاللى الوطن بيثور.. أنا قلتله.. إهـــــدا
ياعم بطل هزار.. وقول كلام غير ده
تلاتين سنه خملان
مذلول وبيطاطى..
وبتحكمه الغربان ..وبحزبها الواطى
وياما شاف من عز ......خرطوش ومطاطى
قاللى خلاص انتفض ..والدنيا اهيه شاهده
زمن السكوت انتهى ......وكل يوم منده .
******======******
الورد واقف فى الميدان مارد
وبتقتله ياجبان بدمك البارد
مين اللى قالك ياهُبَل ..إن الورود تتحَـش
إنت اللى زايل وتاجك ..
وصولجانك هَـش
واللاتى والعُزه أهم حواليك
لا حد قام ينجدك ..ولا حد باقى عليك ..
واقف وحيد منبوذ .....محمى بكومة قَـش
مرفود بفعل الجموع
مرفوض بفعل الجوع
ومن النهارده المباح ..خلاص بقى ممنوع
ومن النهارده التاريخ .....بيسطر الموضوع
فرعون وكنت زمان
دلوقتى آن الآوان ...
تبقى البعيد مخلوع .
****====****
إرحل بقى ياهُـبل....إرحل ياديكتا...طور
صحيح معَصلَج وعِنًـدى ...وفى العناد دكتور
وماكنش ممكن تصدق ...إن الورود بتثور..
بركان غضب وانفجر ..
طالع يشوف النور
زئير هتافهم يشـيّب ...بيكسروا الأسوار .....
ويحطموا الطواغيت...وبيكشفوا الأسرار
آدى الورود طالعين ...المعجونين بالطين ..
واتعلموا ف حطين..
وف بدر والياسمين..
وشافوك ياخاين بايعهم.. فى القدس وفلسطين
ملعون فى كل كتاب ..
وف كل مله ودين .
****====****
باب الجهاد ياجدع ...على مصراعيه مفتوح..
وجنبه سكة هوان ...وصوت خفيض مبحوح
شوف انت فين سكتك..؟
وشوف لفين هاتروح ؟
وحط روحك فى كفك
حاول تموت .....هاتعيش
صدقنى حان الخلاص.....
وياروح ما بعدك روح
****====****
يامصر ..يام الحضاره ......يام التاريخ والنيل
خلوكى ليه محنيه...جسدك عليل وهزيل
بتموتى لجل الرغيف
والليل طابور ومخيف .
خلوكى ليه عيانه ؟
خلوكى ليه غلبانه ؟..... متسرطنه وخربانه
وف عبّارات الموت ....مرميه ليه غرقانه ؟
متدّفيين فى القصور ...
وسابوكى ليه عريانه ؟
ويشحّتوكى ليه ؟....ويشحطتوكى ليه ؟ ....ويخصخصوكى ليه ؟
مليون سؤال ياوطن ...
ومفيش إجابه عليه.
وبقتى ليه حزنانه ؟
وبقيتى ليه خيبانه ؟
متعلمه وجهلانه..
وكنتى ست الكل .......خلوكى ليه متهانه ؟.
ماتندميش يامصر ...وماتكونيش زعلانه.
****====****
وماتسأليش.. يامُ الولاد ....
ليه الولاد هبوا ؟
يمكن عشان اتألموا ....يمكن عشان حبوا ..
يمكن عشان فى الهوان ..
إتولدوا واتربوا
إشتد عودهم خلاص واتمكنوا وشبوا ..
وسع طريق للفلول
الطاغى جاى للمثول
والشعب أصل الأصول..
والظالم اللى طغى .....ذنبه على جنبه .
مش كانوا لسه صغار ..وبيجروا فى الحاره
سبحانه ده اللى وهب ...
حنيه وجســاره .
طبطبى بإيدك عليهم
أحضنيهم
وافتحى قلبك خديهم ..
ألف رحمه ونور عليهم .
شوفتهم بعيونى بيحاربوا الطاغوت .
مااستسلموش للذل ....وماهَمْهُمش الموت .
الورد فى التحرير ..بينادى ع الياسمين
والدم سايل بيرْوى ...ويعطّر الميادين
رايحين ومش راجعين ....بس النهار راجع
رايحين ومش راجعين ..
بس الأمل طالع
غول السكوت بيموت...
والحق صوت طالع ..
يكتب فى مجد الوطن ....وبيقرا فى الطالع
شايف أكيد ع المدى ..
هرم الفساد واقع...
لما الوطن بيثور ....يبقى الوطن رائع ..
يكْبَر ....مفيش مانع ..
يحلم .......مفيش مانع..
يفرح ..........مفيش مانع
موضوع: لما الوطن بيثور 
الخميس مارس 10, 2011 11:30 am
